Биыл 222 мың бала мектепке барады

Биылғы жаңа оқу жылының жаңалықтарының бірі – өңірде үш ауысымды мектептер болмайды. Бір апатты, бір үш ауысымды, үш орын тапшылығы бар мектептің мәселесі толығымен шешілді. Бұл мектептер 1 қыркүйек күні жұмысын бастауға дайын. Тарқатып айтсақ, Т.Рысқұлов ауданы Жалпақсаз ауылындағы 48 орындық бастауыш мектеп, Байзақ ауданы Ақшолақ стансасындағы 120 орындық, Шу қаласы Тоғай алқабындағы 300 орындық, Жамбыл ауданы Бірлесу-Еңбек ауылындағы 140 орындық және Меркі ауданы Қазақ-Дихан ауылындағы 120 орындық орта мектептер.
Жалпы облыста 442 жалпы білім беретін мектепте 222 мың бала білім алатын болады. Ал 28 мың бала мектеп табалдырығын алғаш рет аттайды. Өткен жылдармен салыстырғанда 1-сыныпқа баратын оқушылар саны біршама өскен.
Облыстық білім басқармасының басшысы Рахия Тұрмаханбетованың сөзіне сүйенсек, биыл 1 қыркүйектен бастап, 4, 9, 10-сынып оқушылары сабақты жаңартылған білім беру бағдарламасы бойынша оқитын болады. Ал өңірдегі сабақ кестесі тығыз 20 гимназиядан басқа, жалпы білім беретін мектептердің барлығы бес күндік оқу аптасына көшті.

«Aq jol-Aqparat».